ابيات شعر

من طرف قمر الليل في السبت يوليو 28, 2007 9:18 pm

هاك استكانة جاي أشرب عوافــي

أو دزيته لك مخصوص يامايه صافي

كل ما يجي الليل أذكر وفــــاكم

واذكر محاشي الطيب وابجي أبرهاكم

وحدي ابنص الليل بس حيرتي أوياي

أبجي أعلى وقت الراح واتنطر الجاي

إشما تقول الناس عندي أنته لول

سو كلشي بالدلال يالحلو مخـول

يالتون تالي الليل سمعني حسك

لولا القلت والقال لعبر وونسك

أرد انشدك وارجوك صارحني ياهواي

تذكرني لوغصيت من تشرب المــاي

نارك يخايب ماي مومثل نـــاري

اومن يطري بيا الشوق يحترق جاري

بالك تقول الاه ياخويا بـــالك

كل التقوله ايصير روحي ابدالك

مبخوت أضل للشيب يافلان أذكـرك

أوينكرني نور العين من كون أنكرك

بيدي أوقرضها الفار فجت عباتي

كل هذا ماطخيت وامشي ابرهاتي

أتمنى كون أيصير لحدي أويا لحدك

أو من يطلع الدفان أقعد وقعـــدك

شقيت ثوبي أعليك وصلته للنــص

جاوين قلبك أوياي صاير مثل جص

لاتهتم على الراح وي همك الراح

والعالي مو بالطول بالصبر ينلاح

اشمالك يبعد الروح لونك تغــير

عندي خوات أهواي طب أوتخير

سبحان امن خلاك تقسي ابغرامك

جانك اتداوي اجروح رقت كلامك

ارد انشد الصباغ هم يصبغ اقــلوب

اصبغ دليلي اعليك واحزن فرد نوب

حـط باللبن تيــزاب مجبـور أشربـه

بس لا أشوفك يوم تمشي وي غربـــه

سباحه لك بالروح خضرى أوطريه

تسقيها من تشتاق وتمر علــــيه

الدنيا بس أوياي صارت حريصـه

أو من سلة المكتوم تطلع لي شيصه